Drei Dääg im Joor voll Säligkait
drei Dääg Fasnachts-Heerligkait
so hett men amme friehner gsait
denn goot dr Vorhang wieder zue
und dr Räscht vom Joor isch Rueh
Hitt isch die Rueh scho lengschtens gsteert
und s Ganzi lauft fascht umgekeert
hitt muesch nimm drey Dääg go verwache
hitt kasch s ganz Joor go Fasnacht mache
denn mit dr Fasnacht wird huusiert
sy wird im- und exportiert
Vyyl Basler Gaischt verschwindet ganz
und sunnt sich wyt ewägg im Glanz
vo Karneval und Mummeschanz
vo Alpuffzug und Dootedanz
me isch an jedem Firlefanz
ob nooch, ob färn, jooruss, joorii
wenn d´Kasse stimmt – sehr gärn derby !
 
Findsch zmitts im Summer schyynts tout Bâle
am Karneval vo Montreal
Au cortège du Grand Charivari
some Folklore-Larifari
und Festival of Comedy
isch s’Comité au mit derby
lauft mit dr Gundeli verby
mit Waggis und mit Alte Dante
brüschte sich die Komödiante
und behaupte denn persee
die ganzi Wält heeb sy dert gsee...
aber s’Fazit vo däm Gfasel
s’länggd nur grad fyr Telebasel
dert seesch fyr e baar Minute
e Gruppe Gundeldinger Pfludde
mit em Felix defiliere
und zum das alles z’inszeniere
ellai fyr d’Goschdym z’transferiere
s’goot der fascht e bitz uf d’Niere
schänggt dr Lotteriefonds gly
satti zwanzig Riesen yy
Giengs noo gwysse hooche Heere
kennt me s’Ganzi jo au keere
holt vo Venedig Gondoliere
und e Hampfle Arlecchini
und schlaift sy doo in d’Fasnacht yyni
in unserem Canale Grande
im Rhy, do kennte sy guet lande...
Umgekeert duet me sich dummle
haut’s au nach Bangkok zum go drummle
d’Fasnacht isch nimm fyr uns ellai
ob Köln, ob Mainz, bis nach Hawai
und hesch es gheert – au in Schanghai
sinn mir Basler scho dehai...
vyllicht macht gly d Olympia
e Morgestraich in Afrika
und wird s’Joor zwaiezwanzig syy
glaubsch die pfyffe, schigg dy dry
no d’Fuessball-WM z’Katar yy...
Kasch aber au in Basel blyybe
im Groossroot herrscht au Naaredryybe
wenn d’gseesch, was die so alles blaane
duet aim das au an Fasnacht maane:
Härzstygg, Dyyrm und Oscht-Tangänte
und no mee so Zyttigsänte
hejo, d’BAZ isch jo sowieso
zur Fasnachtszyttig lengscht verkoo
Moritz, gäll mer hoffe nit
dass’s mit Dir e Grounding git...
Au im Theater wird mit Macht
uf dr Byhni Fasnacht gmacht
nur so-ne Fasnacht war noch nie da
wie z’letscht die füdleblutt Aida
Immer Fasnacht, rund um d’Ohre
hesch by dr Floorabiitsch-Folklore
und sitt dass es die Burka gitt
machsch jetze none bsundre mit
sone Vermummig, nai, y bitt
erinneret aim an Fasnachtshit:
vo friehner: gäll, de kennsch mi nyt ?
De seesch im Vogel Gryff sy Danz
näggschtens uf dr Hülfteschanz
und d’Kienbääse, s’wär kai Saich
verbrennt me denn am Morgestraich
oder z’Riechen usse amme
die sinn jo immer Fyyr und Flamme
Au d’Summerfasnacht isch dr Clou
mit Sennetuntschi, Mäh und Muu
und Mexikaner am Tattoo
Sisch aber alles halb so schlimm: au unsre Stapi-Babbe
drait schliesslig s’ganzi Joor e Naarekappe !
 
Mit some Fasnachts-Hüscht und Hott
griegt jeden Ort sy Wärbespott
mir finde das nit bsunders flott
denn ebbis hett ys scho verdrosse
yberall wird Gäld verschosse
nur mir und andri Jungi Garde
kenne uf die Stytz denn warte
unsri ganzi Wärbewält
isch aimool im Joor – e Zält
fyr mee hetts offebar kai Gäld
mainsch, wär das ächtsch so furchtbar schwär
wenn by däm ganze Hi- und Här
fyr uns au ebbis ybrig wäär ?
 
Fasnacht – quo vadis – wo gosch aane
was bringt d’Zuekumft nundefaane
no mee Glanz, no mee Furore
no mee Ussland rund um d’Ohre ?
D’Frau Fasnacht haltet ys e Preedig
sy haig das Raise gar nit neetig
Venedig ? Schanghai ? Kanada ?
das miess sy alles gar nit haa
sie bruucht kai Wärbig, kai Import
und wenn me no so anere boort
sy goot nit furt, sy blybt an Ort
und das ka nummen aine sy:
bym Bebbi, z’Basel an mym Rhy !